রিনি চা ধুঅ পত্থান ফেলে উজু কত্তা দিনে ভূই' এ্যাল ধুরি আদি যার। পাগানা ধান শিজে লুঙি পরং পরং। দেগিনে চোগ সুগ লাগিলেয় ইক্কু এ বেল পজিম মায় গায় গায় অনায় এক্কা বাঝুক ভাঝাক লাগের। আদুত্তুন অজল ধান শিজে সেরে সেরে যার কিনে শন সিরি সিরি সাপ যায় কধান মনত পড়ি কেইয়্যা সুরসুরং গরের।সেনে তনক অই গজাং গজাং আদা ধরে রিনি চা কন বেল পহর থাক্কে থাক্কে ঘরত লুমি পারে নি। লাষ্ট টিপ গাড়িত গোরি এযানায় দেরী অইয়ে।ইজো ভরপুর জারকাল ন পল্লেও দিন ভজমান বাধি অইয়ে।
মুঅ সাঝি মায় মায় রিনি চা ঘরত লুমে। সিংগবাদ চেরাক জ্বলের। গুদি ভিদিরে ঘরর চিগোন জোড়া পাচ বজয্যে ছদগে আ সাত বজয্যে সোনাক্ক ঝক বুত্তন। রিনি চা মু ভাবেই চাইদে বিচ্চন কাবড় চুবর এগজা লেজ গাত্তে। পোজা পিড়ে উবোত যাবত ইলে চেদেরে। রিনি চারে দেগি দুনোজনে হাক্কনত্ত্যে মহ্ অই আ যা হেচ তে রজান। এধক দিন পর ঘরত এই রিনি চা ভেই বোননুত্তুন যে উমান পবে ভিলি আওজ গজ্জে সে উমান কিত্যে জানি ন পায়। যা ধগে তে যা মাক্কে তে আক্যা আক্যা দুরত সয্যে সয্যে। রিনি চা সিত্তুন সেনে পিজরত এযে। তা মা চুলো ধাগত কুচ্যাত মরিচ বাদের। চুলোত আগুন' দাড়বোর ফুদ আঙারা ফুত্তন। চুলো দোরত নিগিল্লে আগুন জিল' পহরে রোদে পুজ্জে রাঙা মুয়ান আ বেজ রাঙচ্যে অই উত্তে। চুলোত দাড়বো মেজেই দি রিনি চারে দেগি আম্ভক অয়।কয়,উজু রিনিক্ক এনা! সেনে ডালগচ্যাবু রানেত্তে তোন তাবাত বুরেই পুজোর গরে,মা পুদি, ইক্কু তে নে এলেদে?রিনি চা ঈ পুরেই পুজোর গরে, আ তুই ভাত রানত্তে চিপুদি কুধু?
- আঘে দ। গুদি ভিদিরে অভ আই। কি অভ কিজেনি ইবেলোই!
- আ কি অইয়েদে?
- কন ভিলে শরত কুমোনি চাগুরী গত্তগোই।লেগাপড়া কন আত্তে সমরি থইয়ে। এ উরগ উরগ।ত বাবে ধমি ধমি এল। এইচ্যা মুই ন এলুংগে পিজে কি যু উত্তে যদেপদে অকধা কইয়ে পারাপাং। চিপুদিও অইয়েদে আঙারা পেদেইয়ে(অভিমানী)। মুই মাদেইয়ুংগেও ন মাদে। তুই এক্কা বুঝেই চেচ।
- আ বাবা কুদু?
- আগে সিয়্যা ভাদ খেই লাম্মেদে। এইচ্যা বড় বাজারত যেই সের আন্দাজ শুগর এ্যারা আন্ন্যং। সে তোনানদোই ভাদ খেই লাম্মেদে।সেনে আত্তনছাড়িত পানি লোই রিনি চারে ভাত খেবং কই ছদগরে ভাত খেবাত্তে ডাগে।হাক্কন পর গুদিত্তুন সমত দে ছদগে,মুই ইক্কু ন খেম।
-আ হক্কে খেদে?ইক্কু ন খেলে আ এক জগদাং অভে আই। আয় বা,ভাত খেই।সোনাক্ক আনদে সিভেরে।
-ইয়ো মামা ছদগে ন এব ভিলি। তাস খেলা পাদানি কুধু থোইয়ে সুব ন পার। সিংগবা দোরত্তুন সোনাক্ক কই দে।
-এ্যাই সিয়ানি পারিবেদে।
জেরে ঝাজি খেই ছদগরে আক্কল দিনে সোনাক্কও এযে।
- মুই ভাদ ন খেম কলে!কুত্তেরি ননেইয়্যা কানং কানং রহ্ নিগিলেই ছদগে।
- জুচ গুরি ভাদ খা। ইক্কু ন খেলে রেদ সম্ভাগত উধি তে পেত পুরের কধে মালেন।
- সালেন তাস খেলানি আগে তোগেই দে। ছদগে উল্লো গরে।
- ইয়ো বেচ ন তেনতেনচ।বাচ্ছেই ছন্দবন্দ বানেম।
তা মার বড় জোগারে ডরে পরান এত্তুক ওই ছদগে ভাত পয়োত বজে। রিনি চা মা অগমানে হনসুকসুক অই উধে,ইয়ুনদোই কি এধক মু বাচ্চেং। কদক আর পারে! দিন্নোব বার' কাম গোরি রান্ন্যে বাচ্চে ভাত্তুনও সুগে খেই ন পায়।আরোক্ক আঘেদে পেতপোড়া খবর আগেও উধো নেই নেইও উধো নেই। ভাত' উগুরে কি রাগ!কি মরার এদক অভুলোর ধুচ।
তা মার এ গায় ন' সইয়ে অসন্জুগী ভেদ আলামত উধিচ ন' পিইয়্যে মন গোড় আ সাধি ন' পাজ্জে গুমোর কেনা,জিদ-ঘিন মিঝিল্যে এক সান্যে উমেইয়্যে ভাবে এ জুরো জুরো সাজন্যা রেদতও রিনি চার উমুচ্যা লাগে।
ভাত খেই রিনি চা মা কুদুশাক গম গরা ধরে।রিনি চা যেই তা কুরে বজে।তা মা শুগোনো আজি কয়,আত্তে ন অভ ন কিচ্ছু;দেক্কে দেক্কে শুগেই যার।তে কুদুশাগ লুদিআন সারে দোংগে।রিনি চার মনে অল তা মাও এ লুদিআন' দক সিধে অর,শুগেই যার। আদিক্কে গোরি দেলে পরিবর্তন চোগত পরে কিনেই পারাং রিনি চার মনে অল তা মা আগত্তুন আড়বো কাত্তোং চিত ন ভিচ্ছে হেঙেদা হেরেত্তে অইয়ে। রিনি চা তা মার জিরেন নেই নিআলজি কাম গরানার সুধোম চিগোনত্তুন ধরি দেই এযের। রিনি চা কোজলী গরে ,মামা এধক কি বেচ তুরতুরাচ?
-কত্তে আয় মা পুদি,মর কি জিরেন আঘেদে নে!খবর দ পাচ ত বাবে দুক্কামত হরিবল।আমনে ন ধল্লে আজা নেই।
এন সময় রিনি চা বাবে বারেত্তুন এ্যাই মত্তনি হিজেহিস্যে বাজায়।দেদে দেদে মে এক্কা পানি গরম গোরি দে।আঙুল্ল বেজত্তুন বেজ তনতনার না চিগচিগার কই ন পারঙর।
- কি অইয়েদে বাবা?রিনি চা পুজোর গরে।
- কেল্লে উদোল দড়ি কাবদে এ বুজ্জে আঙুল্লত তাগল' কুপ পজ্জেদে। আঙুল্ল রিনি চারে দেগার।ভজমান ফুল্লে। ঘাআন' কাজায় কাজায় পুজ সান ধুব গোরি কয়েক্কান মু ভেদা দিইয়ে।
এ ভিদিরে রিনি চা মা গরম পানি কেদলিবু আনিনে রিনি চা বাব আদত গোঝেই দে,ধর ধগোই যা।সিত্তে কইযুংগে দারু আন্দোই।খেইয়চ্ছে আ শুগোর এ্যারা।
রিনি চা বাবে ন মাদে।হাক্কন জুর থেই লারে গুরি পুজোর গরে, মরত্ত মা, তেঙেরারে লাগত পেইয়ুংগে। কত্তে, এইচ্যা ভিলে কোন বেয়্যারীয়ে মাল ন লন!অয় নে?
- অয়। ফদাফুত্যেউনদোই পুদুপাদা গোরি এইচ্যা এক্ক বেয়্যারীয়ে মাল মুলেইয়ে নেই।বাজার দর' অদ্ধেক দাম দ্যুন। এদ্দুরত এদক্কানি আদা ওলোদ বৈই নেযেনে ফিরি আনিবারও নয় সেনে দে আন্দাজে বেচ্চংগে।
- আ ওয়ে আই। এ হেদা পরান্যে জুক্কনর নি ভালা সুজানার গেজ হারায় মরে!
- ফদাফুত্যেউন' পুনে পুনে ভাঙা পইয্যেউন যিয়ত যু পাদন সাক বত্তন।আদাম বাচ্চে আবুচথাক্কি কাজেইয়ে।
- আক্করেদি ফদাফুত্যেউনর দবদবা এল;ইক্কু এ ভাঙা পইয্যেউনেই তারারে দিয়েই যাদন। কুধু আর থেই পাত্ত! এ ঘর ভিদে,বাগান থেই কি অভ? আদাম' বেজ ভাগর নিজ ঘরপাদা জাগানর পজ্জন লেঘাপড়া নেই। তারা গেলেগোই আমি কি থেই পারিবংগে?বড় আজা ন গরং।
- নিজ মানুচ্চুনেও দ এক্কা ঝলাব্বর গোরি খেলে চোগত তুলোন।দেবেদা চোগত্তুন মানয্য চোগত উদানাআন অলে বেজ আগাত্তে।
- আলাজে আমা সান চিগোন সংসারীউনে যেদক মন গত্তং সাত কানা কুমত পানি ঢালে পা কিচ্ছু আর অদ নয়। এক্ক শিলত তলে এক্ক কাঙারা।
মা-বাবর এ বেজার বেজার উধুরি পজ্জে অসন্জুগ খবর রিনি চা ন পায়দে নয়।আদাম' ধারানে তারারে থাগুয়ে কলে সয়। বিরেট শাক্কোন বাগান আঘে।বাচ বাগানও আঘে। মুরো আঘন কয়েক্ক।ভুই জমিনও আঘে সারে পারা।ইঙিল্যা ইঙিল্যা দ্বি-তিন বার লুদোন খেই এক্কা নিরেতিত্তেত পজ্জন। মাত্তর , ইয়েন বাদ গোরি সয়-সম্পত্তি যেদক থেব থোক বেল ন থেলে যা অয় তারারও সে দজা।
বিন্যে আয়সায় হুয়ো পজ্জে। শিরো পানিয়ে এ্যাল খের' চাবারা এক দুরত্তুন ধুব গোরি দেগে। এদে আগারে মুরোমুরিউন রাণী হুয়োই ঘিরি রাগানায় দেগা যাং ন যাং।ছড়া পানি তা সুধোমে লামনী বেই যার।গরম পানি ভাব সান ছড়া পানিত্তুন হুয়ো উরি যার।অক্তে অক্তে জুরো আভার ননেইয়্যা কিরবেই জার' কাদা উদিলেও রিনি চাত্তুন গম লাগের।কানসুগ লাগের ছড়ার ওকূলত আলসনার এ্যাত,এরে-তিতি-ব-ব রহ্।এ ছড়াপাড়ত চিগোন কাল' কধা ইধোত গোরি রিনি চা সনমরা অই উধে।ইন্দি তা মা যে তা কায় এচ্চে তার উচ নেই। যাদে যাদে তা মা পিচ্ছে ফিরি কয়,মা পুদি, গুলেক বিনি ভাত রান্ন্যং। খেচ্চই সিয়্যা। চিপুদিরেও ডাগিচ।মর দেরী অর যাঙরলোই। রিনি চা মা কাল্লোং বুক্যা হগ হগ গোরি যাল্লোই। রিনি চাও সেনে তাগলগত্তুন পানি ভরিনে কুম করত গোরি এযে।
গরুয়ুন দ এজ বান্যে আঘন, পাগোরে হক্কে এব চেই!কই কই রিনি চা বাবে ঘর' অবলান্দি যেই রহ্ সারে।ও পাগোর,হক্কে এবে? ঝাদি আয়,বেল দিভোর অভ হাক্কে। গরুয়ুন বান্যে আগন ইজো। ওকিত্যেত্তুন হাক্কন পর জোব দ্যুন,পাগোরে দ এক্কা কেইয়্যা বজং বজং পার।এ্যাই ন পারিব। রিনি চা বাবে বুদবুদায়, এ ইয়ুনরে গাবুর ধল্লেও কি?কই কই ডাগি ডাগি কাম খানা। সিত্তুন আরো কাম হুয়ান।ন অভদে ইয়ুনদোইও........।
মুজুঙত সোনাক্কলোই ছদগে থিয়েই আঘন।মনে মনে বাচ্ছেই আঘন তারা কন গরুচরা যেই পান নেনা। রিনি চা বাবে যক্কে কয়,সোনাক্ক গরুউন মুই দেগেই নেযে বানে দিম্বোই।গরুউন রাঘে পারিবে নি?সোনাক্ক উচ্চপুচ্চ অয়,পারিম দ বাবা। তা পুনে পুনে ছদগেও কয়,বাবা মুইও পারিম। সোনাক্ক বেবে সমারে থেম।
গরুউন নিনে রিনি চা বাবে,সোনাক্ক আ ছদগে যানদোই। যা আন্দাজে যা আলে তে কাম গঝি লইয়ুন। রিনি চারে মাদেবার গরজ মন্জুক যেন কারোর নেই।যেন তে গরবা। রিনি চার ইজো ভাত খানা ন অয়। পিজোরত যেই রিনি চা ভাত-তোন তোগেই চার। পাহ্ মাধাত খলা ভাত,ঝুরগোউনত তোন পিলে আ এক্কত বিনি ভাত।রিনি চা ভাত খেবাত্তে চিপুদিরে ডাগা এযে।
চিপুদি দ্বি আদু সেরে মুআন লুগেই এল। কিল্লে রেদত এক সিজিত থেইনেও তাল্লোই কোন কধা ন অয়। কালিক রেদত চিপুদির ভাবযেইয়ে ব নিজেস আ নিগুচ নিগুচ ফোবানি মেত পিইয়ে। আদিক্কে ইয়ানরে বিজেই দেনা অয় ভিলি রিনি চাও তারে ন ফুজুলায়। উল্লে উল্লে কিচ্ছু পুজোর ন গরে।ইক্কু রিনি চা কায় ঘোনেই চিপুদির মাধাবু পুচ্ছেই আ ডাগে, চিপুদি- রিনি চার চিত দীঘোলী মাদানায় ঝাগারা যেই পাগানা বড়ই বুদু সিনে পা চিপুদির রাগ-দুগ-অগমান গলি যেই চগো পানি অই ঝরি পড়ে।
চিপুদি পল্লে ধুরি আন্নে অগলগ' সান মেইয়্যে কোজলী চোগে রিনি চারে চেনে রিনি চার আদ এক্কান ধরি চিগোন গুরো ধক গঝি গঝি কানে। রিনি চা কি গরিব বুঝি ন পারে।চিপুদির চগো পানিয়ে নাগ পানিয়ে এগত্তর অই লারে লারে কানানি ধেক কমি এলে রিনি চা গম্ভীর অই পুজোর গরে, মে কোচপাচ? চিপুদি মাধা থিগুত থিগুত গোরি ঈ পুড়ই।
- কেনে বুঝিম চেই মে কোচপাচ! রিনি চা সহ্য গোরি বিচ্চেজ যাং ন যাং গরে।
- বেবে,তুই যিয়ান কবে মুই শুনিম।রিনি চার চোক্কুন ভাজা ভাজা অই উদন; চোগ পহর ঘুল অই উত্ত মাগে।
-আচ্ছা , মনত রাগেচ।মে ধরিনে সমত খেলে।মুই তরে অকধাও কধুং নয়, বলাজোরেও কিচ্ছু গরা বাঝে দিদুং নয়। ভাবি চেচ কি গরিবে? কি সাধি পারিবে? যেই ইক্কু ভাত খেবংগোই।মত্তুন পেত পুরের।
রিনি চাদাগি ঘরানদোই তা আত্যা-বরঙা ঘর বড় দুরোদুরি নয়। রিনি চারে দেগি তা আজু-নানু খুজি অন।সেক্কে তা নানু দিবুস্যা সাজর রানা বাড়া গরের। তা নানুর ঝিও ঘর' ব্যেয়-ব্যোনী বেড়া এচ্চ্যন। রিনি চা তা নানুরে বল দে।মেজাং উগুরে ভাত তোন জুগলেই দে।রিনি চার আত্যা-বরঙাদাগি পুরোন মানুচ। পুরোন' রীদি-সুধোম, ফাজা-আলাম মানন।
এয এ ঘরত মদ্দে তামুলুগ বাদে আত্তন ছাড়িত আদ ন ধোন। কুত্তির জাব' পানি ন খান। ঘরর বাজন কদরা বেজভাগ পিদলর।এককালে ঝমঝম গোরি চল্লন। ইরুক সে দিন মাধান নেই আর।ভাত খে পুরেই রিনি চারে তা আত্যাবু বিগিদি গরে,নাদিন জদন' খানা কমলে খেবং চেই? এনে নাদিন তুই মন গল্লে মুই জুক্কোল লোই পারং।মুজুঙত এলাক্কে বেক্কুনে অয় লবয় পুরেই মন কোজরেই আজন। এ্যন সময় তে-বচ্যা কালাচানে এযে। কয়, আ যিদু,চিগোন চান' ঘরত নুঅ ধান ভাত খানা বলান্যাত ন গেলা দে। আ গরবা ফেলেও কেনে যেবে?হাক্কন পরে আ কয়, চিগোন চান' ঘরত নুঅ ভাত খানা মানুচ থুবেবাক। সে দশজন' মুজুঙে বট গাচ্চু তলে লড়বোদাগির গাচ চুরর বিচের অভ। আ সে বিচেরত দ তরে মুরুব্বী মান্নন।আ ন যেবে নে যিদু? তরে ম লগে গুরি নেযেবার কইয়ুন।
- যিদু, মুই আর সিয়েনির কুরে কাজে নেই।
- দে অইয়ে আই যিদু।ন যেবা কর যক্কে মুই আদঙর। কালাচানে মনকাদা গোরি যায়গোই।কালাচানে গেলেগোই রিনি চার আত্যা-বরঙারে তারা ব্যেই ব্যোনীয়ে তারা সিধু বেড়েবার উজুলান।
- মনে কলেও কি বেড়ে পারে দে নে!ইক্কু বেড়েলেও ফুন দি দি বেড়ে পায় কুন্দি জুর কুন্দি গরম।
- আ সে কধা কি কবং! খবর দ প গেল্লে বারত আমা পরানধনরে ধরি নেযেয়ন।একদাগির কধা ওদাগির কানত যায়। ন অলেও অয়।বাগান,ভূই বেচ্চে তেঙালোই সরেই আনিলুং। চেইও থেই ন পাজ্জে।
রিনি চা বরঙাবুর ব' নিজেচ লামি এযে। রিনি চা উবুরে উবুরে যা শুন্নে এই ভূই-জমিন ভাগ নিনে তা বাপ্পোই, হুত্তোয়ুনদোই তা আজুর সত পা পি নেই,কজ কজ মুক্যে।
রিনি চা আত্যা-বরঙা ঘরত্তুন ফিত্তে পদত তা চিগোন কাল সমাজ্যা সিবিদিলোই দেঘা।আদারা এক্ক চিগোন গুরো আ তা চিগোন বোন্নু সমুত্ত নুঅ ভাত খানাত্তুন ফিত্তন।আদদে আদদে কধা অয়।আগে একসান্যা। কয়েকদিনত্তে বাব' ঘরত বেড়া এচ্চে। রিনি চা মনে মনে ভাবে সিবিদিলোই তে বড় এর জেবর নয়। এ বয়জত তে পুয়ো করত গুরি সংসার গরের আর তে.........। এ সান্নে উদোর লইয়ে গদবান্যে বান্নেধুজির জীংকানীর পান্জালী মাদেবার ধারাজ-মন্জুক নেই কিনেই অলে সে গঙারত তে ন ভাজে,ন মিজি,ন আযে।সিবিদিলোই রিনি চার কধা ন আক্কোই আর।
রিনিচা ঘরত এ্যই চিপুদিরে পানি কাজি তুলি ভাত-তোন রানদে লাগত পেই মনে মনে খুজি অয়। বিল্লে মাদানত বেক্কুনে ঘরত এযন। রেদত রিনি চারে তা বাবে কায় দাগি কয়, রিনিক্ক দ, ডাঙর পো মরত্তুর খবর দ পাচ। সিভে মনিচ্চর অদ নয় আর।যা অভার অই ফুরেইয়ে। এ চিগন্নরে ছদগরে এক্কা চেরেত্তা গোরি চা কোন ভেলত আনি পারচ নি..........।
রিনি চা বুঝি পারে আওজর ডাঙর পোবুত্তে তা বাবে মনে মনে চিতপড়া খায়। চিগোন থাগদে যাত্তে ডেঙ কলে গেজ ন মজ্জে অলেও তা বাবে পুয়ো সিন্দি আবুচ্ছে কধা কধ।অন্য গুরো ধারানে আমন' গুরোউন আ এক্কা সিভিল। মরত পুয়ো তেঙা পইয্যা ন চিনিলেও কেনে! তা বাবে বানা মরত পুয়াউনরে আঙুদে।মিলে কিনে রিনি চারে সেদক আমল ন দে।রিনি চা ইজেব গরে প্রায় আট্য বজর আগে সং সং তা ভেই মরত্তু সমুত্ত রাঙামাত্যে লেগা শিগা যেইয়ন।তিন বজর' মাধাত তা ভেইবু মন মজিম লেঘাপড়া ক্ষেমা দে।ইন্দি লেঘা পড়ার নাঙ ভাঙেই মনে মন্জক্কা গোরি চল্লে ফিজ্জে। এযান গুরি টো টো কোম্পানীর নানু অইয়ে। সিধু রিনি চা গায় গায় অই যানার পর তা ভালা-মন্দ তত্ত্ব তালাবি গরিবের উচ তা বাবর কোন ক্ষেপ ন এল।উল্লো মন মাজ্জে গায় গায় কেনে থেব?রিনি চা পিচ্ছে ফিরি ন চায় কিনে এইচ্যা তে ভালেদি পধত।বিদ্যা বুদ্ধিয়ে অন্দদ ভাত পানি রাদ অদ নয়।ইন্দি তা ভেই মরত্তু ইক্কু রহ্ ভহ্ ন মান্যে বিষ পালঙে মাত্তল।মনে কলে ঘর টেক্সিয়ান চালায়।খরজি,আহ্ ডাঙর। তেঙা পইজ্যার টানাটানিত এক্কা হ নিজেস্যা অলে টেক্সিয়ান বেজিদ মাগে।সিত্তে তা বাবে নিত্তাগে মুরে মুরে খুম্বিচ খায়।
রেদত ঘুমত পড়ি রিনি চার তা বাব-মার কধাবাত্তা কানত এযে। তা মা কর,এ বজর মূল বীজি ছিদানাও জের পরি গেলগোই।সপ্পানত আমনে ন ধল্লে আজা নেই। দুক্কাম আহধে কোদালে ন গল্লে অয় নি?
- আ কমলা বাগান গজ্জং দ।সবাই কাম ন গরং নেনা!
- বানা লাগেলে অলদে?চৌদ্দ লাগেলে চেরেত্তা ন গল্লে কেনে?আমা জেরে জেরে মানয্যে বেক সত্তানি খেই পুরেলাক।
- মুই দুক্কাম ন গল্লেও ম নাঙে সাক্কোন বাগান আঘে দ।
- এক্কা অলে সে সাক্কোন বাগান। আ কি এদক তেঙা কামেই পারত্তে?পোর মাদি পারত পরে।
- আ বাচ্ছে থাক না!তেঙা কি ন পেম না-
- তলে ধাবত নয়নে কুদুক্কুন গাচ গুচ্চে গুচ্চে আঘনদে। কাজিয়ে উয়ে খেই পুরেদাক।গেল্লে বারত নয় নে কুদুক্কুন তেঙা পারমিট অভ অভ গোরি গুনগার দিলেদে।
-এ বার ন অভ। ডিসি অবিজত্তুন 'এ ফরম' লই হেডম্যান' কাম সিরেই আ ডিসি অভিজত জমা দ্যং।তেঙা কয়েক আজার গঝেই দি পাল্লে অভ।
রিনি চা তা বাব-মার কধা উভোত ন ধরে আর।লারে লারে দ্বি চোগ পাদা লামি এযে।আন্দার থাক্কে থাক্কে রিনি চা মা রানা বাড়া গরা ধরে। সে সমারে সমারে রিনি চাও উধে।আযান' রহ্ শুনো যার।সে জেরে জেরে দুর কিয়ঙত্তুন রিপ রিপ গোরি ভান্তেউনর শীলে কনার রহ্ শুনো যায়।
বিন্যে পহর ফুদিনে ঘর মানুচ্চুন ঘুমত্তুন উত্তে উত্তে রিনি চা মা এক্ক আন্দাচ্চে কাল্লোঙত খেদত কুজিবার সুমিবীজি, গেজেইয়ে পুরোন বিলেদি আলু, কিজু রেইবীজি আ কলা পাদা বেরেইয়ে ভাত মোজা জুগুলোয়। রিনি চাও যেবাত্তে জুগুলেইয়ে। তা মাল্লোই ফারক অবার সলাত মুজুঙো মুজুঙি অই তা কোচপিয়ে মাব' কায় ভিদিরে ভিদিরে লঙি পত্ত মাগে।তার সারাল্যে পরবাচ্যে জীংকানীত সাদাঙা সময় চিবেত জিত্ত গোঙার লড়বোর বিজিরে অরান মনান ভাউন্দি পেই পরান হজরেই ননেইয়্যা গুরি মুরগুজিবার ধারাজ রজায় চুবে চুবে।রিনি চা ওজদী গুরি কাঙেল কাদা উজু গোরি থিয়ায়।
লেঘিয়্যে: মুক্তা চাঙমা