চাঙমা র (ধ্বনি) নিনেই গভিন তলবিচ ন অহ্’নাই এভ সং তুজিমপুর’ চাঙমা বানান-সুধোম গরিহ্ পারা ন্ব যাই। নিজর চাঙমা অহ্’রক থেনেও সত সত বঝর ধরি বাংলা অহ্’রগে চাঙমা ভাচ/সাহিত্য চজ্জা গরান্হায় চাঙমা অহ্’রগে চাঙমা বানান-সুধোমও থিদ’ ন্ব অহ্ই। এধক ভিলোন বাংলারে ভর গরিহ্ চাঙমা সাহিত্য রজানায় আা কধা-ভান্দাল লেঘানায় এভ সং বাংলা অহ্’রগরে বাদ দি পারা ন যার, যুদিও বাংলা অহ্’রগর কয়েক্কু র চাঙমা রলৈ ন মিলে। যেন- চ, ছ, জ, ঝ, ড়, ঢ়। চাঙমা অঝাপাদত এভসং টা, ঠা, ডা, ঢা অহ্’রক্কুন থেলেও ইরুক চাঙমা ভাঝত সিগুনর লারচার নেই, মুওত আক্যেং নেই ক্বো যাই। সেনত্তে চাঙমা গুরোউনর বাংলার ট, ঠ, ড, ঢ, ড়, ঢ় এগুনোর সুদ্ধ উচ্চারণ সিঘদে কেইতকাত যাই। আর চাঙমা বানান সুধোমর একখান পুরোনি রিদি অহ্’লদে ‘মাজ্যেপাত”। এ মাজ্যেপাত নিনেইও নানান জনর নানান মত আঘে। এ বাদেও চাঙমাত জধাওক্কোর লারচার গরাহ্’না ন গরাহ্’না নিনেইও বিতর্কর থুম নেই। দেঘা যাত্তে এঙিরিহ্ চাঙমা ভাঝর ভালেদর বদলে অভালেত বেচ অহ্’র। অ্যা বেক্কানি চিদে গরিহ্’নেই জুমফুল‘ত চাঙমা ভাঝে লেঘানাত সং আন্হিবাত্তেয় আমি এ বানান সুধোমান জুক্কল গচ্ছেই। আমার বানান সুধোমর সমারে এক অহ্’লে জুমফুল’র বাহ্’রেও লারচার গরাহ্ যেব। এ বানান সুধোমর আগে কিয়োই যে ন্ব গরন সিয়ান নয়, কয়েকদাঘি এ বানান সুধোমর পৈদেনে কাম গচ্ছুন। আমার আগে যারাহ্ গচ্ছুন আমি তারার সিদ্ধান্তআনিও মাধাত রাঘেয়েই। আর বুঝেবার সুবিধেত্তে গরচমজিম International Phonetic Alphabet (IPA) দিনেই দেঘেয়েই। নিয়মর ধগে ধ্বনিমূলত্তে / / আর সহধ্বনিত্তে [ ] লারচার গরাহ্ ওহ্-য়ি।
অহ্’রক লারচার
ক/𑄇 লারচার: চুচ্যেঙ্যে-𑄇’বু দ্বি রলৈ লারচার অহ্-ব। সে দ্বিবে র অহ্’লাক্কে /k/ অর সহধ্বনি (Allophone): অঘোষ জিহ্বামূলীয় ঘর্ষণজাত অল্পপ্রাণ [x] ও অঘোষ জিহ্বামূলীয় স্পর্শজাত অল্পপ্রাণ [k]।
১। চাঙমা মাদত ক/𑄇'বু সরান্যে গরিহ্ (স্বাধীনভাবে) থেলে তা রবু [x] অহ্ই। যেন- 𑄇𑄎𑄧𑄢𑄴(কাজর) , 𑄃𑄧𑄟𑄧𑄇𑄧𑄘𑄧(অম’কদ), 𑄇𑄨𑄎𑄨𑄁(কিজিং)।
২। চাঙমা মাদর ক/𑄇'বুত মাজ্যে, বলেমাত্যে মাজারা (ফলা) থেলে আা জধা গরিহ্ থেলে তা র'বু [k] অহ্ই। যেন- 𑄗𑄧𑄇𑄴(থক), 𑄇𑄳𑄢𑄧𑄇𑄴𑄇𑄳𑄢𑄧𑄇𑄴(ক্রকক্রক), 𑄛𑄇𑄳𑄈𑄬𑅅𑄚𑄴 (পাক্খোন)𑅁
(দৈনাক্যে, তুনুঙ্যে (তঞ্চঙ্গ্যা) সমত জুদো ভাচ্ছানিত বেক জাগাত [k] ইঝেবে লারচার অহ্’ব।)
খ/𑄈 লারচার: গুজঙ্যে-𑄈’বু দ্বি রলৈ লারচার অহ্ব। সে দ্বিবে র অহ্’লাক্কে /kʰ/ অর সহধ্বনি (Allophone): অঘোষ জিহ্বামূলীয় ঘর্ষণজাত মহাপ্রাণ [xʰ] ও অঘোষ জিহ্বামূলীয় স্পর্শজাত মহাপ্রাণ [kʰ]।
১। চাঙমা মাদর পৈলেদি খ/𑄈'বু সরান্যে গরিহ্ (স্বাধীনভাবে) থেলে তা র'বু [xʰ] অহ্ই। যেন-
পৈলেদি: খাজর/𑄈𑄎𑄧𑄢𑄴, খক্কেঙ/𑄈𑄧𑄇𑄴𑄬𑄋𑄴, খুরঙা/𑄈𑄪𑄢𑄧𑄋, খুঝি/𑄈𑄪𑄏𑄨।
২। চাঙমা মাদর পৈলেদি, মধ্যেদি খ/𑄈বুত বলেমাত্যে মাজারা (ফলা) থেলে আা জধা গরিহ্ থেলে তা রবু [kʰ] অহ্ই। যেন-
পৈলেদি: খ্রেক খ্রেক/𑄈𑄳𑄢𑄬𑄇𑄴 𑄈𑄳𑄢𑄬𑄇𑄴, 𑅁
মধ্যেদি: পেক্খুন/𑄛𑄬𑄇𑄳𑄈𑄪𑄚𑄴, 𑄘𑄪𑄈𑄳𑄠𑄬 (দুখ্যে)
(দৈনাক্যে (Daingnet), তুনুঙ্যে (তঞ্চঙ্গ্যা) সমত জুদো ভাচ্ছানিত বেক জাগাত [kʰ] ইঝেবে লারচার অহ্’ব।)
হ/𑄦 লারচার: হ/𑄦'বু দ্বি রলৈ লারচার অহ্'ব। সে দ্বিবে র অহ্'লাক্কে /h/ অর সহধ্বনি(Allophone): আঘোষ স্পর্শ কন্ঠনালীয় মহাপ্রাণ [ʔ] ও আঘোষ ঘর্ষণজাত কন্ঠনালীয় মহাপ্রাণ [h]
১। চাঙমা মাদর পৈলেদি আা মধ্যেদি সরান্যে গরিহ্ থেলে তা র'বু [ʔ] অহ্ই। তার প্রতিবর্ণ বাংলাত ন থানাই 'আহ্/অহ্/উহ্/এহ্/অ্যাহ্/ইহ্/' লেঘা পরে। যেন-
পৈলেদি: 𑄦𑄧𑄉𑄧𑄣𑄧𑄇𑄴 (অহ্গলক), 𑄦𑄪𑄢𑄨𑄁 (উহ্'রিং), 𑄦𑄬𑄣𑄴 (এহ্'ল)।
মধ্যেদি: 𑄥𑄧𑄦𑄧𑄢𑄴 (সঅহ্'র), 𑄛𑄧𑄦𑄧𑄢𑄴 (পঅহ্'র)
২। চাঙমা মাদর মধ্যেদি আা থুমেদি মাজ্যেসমত আ ফলা ইঝেবে থেলে তা রবু [h] অহ্ই। যেন-
মধ্যেদি: 𑄉𑄦𑄴𑄇𑄴 (গাহ্ক), 𑄇𑄪𑄢𑄳𑄦𑄨 (কু্হ্রি)
থুমেদি: 𑄇𑄧𑄦𑄴 (কহ্), 𑄉𑄧𑄦𑄴 (গহ্), 𑄝𑄦𑄴 (বাহ্)
(দৈনাক্যে (Daingnet), তুনুঙ্যে (Tanchangya) সমত জুদো ভাচ্ছানিত বেক জাগাত [h] ইঝেবে লারচার অহ্’ব।)
ঙ/𑄋/ আা ং/𑄁 লারচার:
১। মাদর থুমেদি প্রত্যয় আা বিভক্তি বঝেদে সিগুনোত ঙ/𑄋 লারচার অহ্-ব। যেন- গাং>অত = গাঙত(𑄉𑄋𑄧𑄖𑄴), লাং+ইয়ে>লাঙ্যে(𑄣𑄋𑄳𑄠𑄬), রং+আন=রঙাান (𑄢𑄧𑄋𑅅𑄚𑄴)
২। বাদবাগিউনত ং/ 𑄁 লারচার অহ্-ব। যেন- 𑄞𑄧𑄁𑄌𑄧𑄁 (ভংচং), 𑄥𑄧𑄁𑄥𑄧𑄁 (সংসং), 𑄢𑄧𑄁𑄙𑄧𑄁 (রংধং), 𑄈𑄬𑄁𑄉𑄧𑄢𑄧𑄁 (খেংগরং), 𑄛𑄁𑄛𑄁 (পাংপাং), 𑄈𑄁𑄈𑄁 (খাংখাং), 𑄥𑄪𑄁𑄥𑄪𑄋𑄨 (সুংসুঙি), 𑄉𑄧𑄁 (গং), 𑄙𑄧𑄢𑄧𑄁 (ধরং)𑅁
৩। ধকজুদো: চাঙমা।
চ/𑄌 লারচার: চাঙমার 𑄌'বুর উচ্চারণ বাংলার চ'বু সান ন অহ্'লেও লেঘানার সুবিধেত্তে প্রতিবর্ণ ইঝেবে লারচার অহ্-ব। মাত্তর, চাঙমা মাদর উচ্চারণ অহ্ব চাঙমা ধগে। যেন-
'চাগা' উচ্চারণ অহ্বদে 𑄌𑄉 (ৎসা-গা)
'কোচপাানা' উচ্চারণ অহ্বদে 𑄇𑄬𑅅𑄌𑄴𑄛𑅅𑄚 (কো-ৎস্'পাানা)
'গাচ' উচ্চারণ অহ্বদে 𑄉𑄌𑄴 (গা-ৎস্)
'সচ্চরম' উচ্চারণ অহ্বদে 𑄥𑄧𑄌𑄴𑄧𑄢𑄧𑄟𑄴 (স-ৎস্-ৎসরম্)
'অ্যাচ্যে' উচ্চারণ অহ্বদে 𑄃𑄬𑄌𑄳𑄠𑄬 (অ্যা-ৎস্যে)
'ঘেচ্রেং' উচ্চারণ অহ্বদে 𑄊𑄬𑄌𑄳𑄢𑄬𑄁 (ঘে-ৎস্রেং)
ছ/𑄍 লারচার: চাঙমার 𑄍বুর উচ্চারণ বাংলার ছবু সান ন অহ্'লেও লেঘানার সুবিধেত্তে প্রতিবর্ণ ইঝেবে লারচার অহ্-ব। মাত্তর, চাঙমা মাদর উচ্চারণ অহ্ব চাঙমা ধগে। যেন-
'ছাগা' উচ্চারণ অহ্বদে 𑄍𑄉 (ৎস্হা-গা)
'কেচ্ছ' উচ্চারণ অহ্বদে 𑄇𑄬𑄌𑄴𑄍𑄧 (কোৎস্-ৎস্হ)
জ/𑄎 লারচার আর য/𑄡 লারচার: চাঙমার 𑄎 আর 𑄡 উচ্চারণ এক্কুই অহ্-লেও চাঙমা মাত লেঘদে বেচভাক 𑄎 লারচার অহ্-ব। চাঙমার 𑄎'বুর উচ্চারণ বাংলার জ'বু সান ন অহ্'লেও লেঘানার সুবিধেত্তে প্রতিবর্ণ ইঝেবে লারচার অহ্-ব। মাত্তর, চাঙমা মাদর উচ্চারণ অহ্ব চাঙমা ধগে। যেন-
'জাগা' উচ্চারণ অহ্বদে 𑄎𑄉 (ৎযা-গা)
'আজা' উচ্চারণ অহ্বদে 𑄃𑄎 (আ-ৎযা)
'মাজ্যে' উচ্চারণ অহ্বদে 𑄟𑄎𑄳𑄠𑄬 (মা-ৎয্যে)
য/𑄡 লারচার অহ্-বদে- যানা, যেকখে, যেমেন, যেধক্যে, যিদধুর, যিদুক্কুন... এ বাবদর মাত্থুন লেকখে।
ঝ/𑄏 লারচার: চাঙমার 𑄏'বুর উচ্চারণ বাংলার ঝ'বু সান ন অহ্'লেও লেঘানার সুবিদেত্তে প্রতিবর্ণ ইঝেবে লারচার অহ্-ব। মাত্তর, চাঙমা মাদর উচ্চারণ অহ্ব চাঙমা ধগে। যেন-
'ঝাগা' উচ্চারণ অহ্বদে 𑄏𑄉 (ৎয্হা-গা)
'আঝা' উচ্চারণ অহ্বদে 𑄃𑄏 (আ-ৎয্হা)
'মাঝ্যেং' উচ্চারণ অহ্বদে 𑄟𑄏𑄳𑄠𑄬𑄁 (মা-ৎয্হ্যেং)
ঞ/𑄐 লারচার: চাঙমা মাত লেঘদে ইভে কম লারচার অহ্-ব। বানা যিয়োত 'য়' আর 'ন' রবুর সমারে নাগা র ঁ (য়ঁ, নঁ) ন্হিগিলিবু সিয়োত ঞ/𑄐 লারচার অহ্-ব। যেন- 𑄟𑄨𑄐𑄧𑄁 (মিয়ঁং), 𑄝𑄬𑄐𑄳𑄠𑄬 (বেন্যেঁ), 𑄇𑄐𑄳𑄠𑄬𑄢𑄟𑄴 (কান্যেঁরাম), 𑄥𑄏𑄧𑄐𑄳𑄠𑄬 (সাঝন্যেঁ)𑅁
ট/𑄑 আর ত/𑄖 লারচার: চাঙমা মাত লেকখে ট/𑄑 লারচার ন অহ্-ব। জুদো ভাঝত্তেয় গরচমজিম লারচার অহ্-ব। মাত্তর, চাঙমা মাত লেকখে ত/𑄖 লারচার অহ্-ব। যেন-
বাংলা, ইংরেজি: 𑄑𑄇 (টাকা), (𑄑𑄬𑄇𑄴𑄥𑄰) টেকসই, 𑄑𑄨𑄠 (টিয়া), (𑄑𑄬𑄇𑄳𑄥𑄨) টেক্সি, 𑄥𑄳𑄑𑄪𑄓𑄬𑄚𑄳𑄑𑄴 (স্টুডেন্ট)...।
চাঙমা: 𑄖𑄬𑄬𑄋 (তেেঙা), 𑄖𑄨𑄉𑄚 (তিগানা), 𑄖𑄧𑄘𑄬𑄇𑄴 (তদেক), 𑄖𑄉𑄧𑄣𑄴 (তাগল), 𑄖𑄨𑄝𑄨𑄢𑄨𑄁 𑄉𑄪𑄭 (তিবিরিং গুই)...।
ঠ/𑄒 আর থ/𑄗 লারচার: চাঙমা মাত লেকখে ঠ/𑄒 লারচার ন অহ্-ব। জুদো ভাঝত্তেয় গরচমজিম লারচার অহ্-ব। মাত্তর, চাঙমা মাত লেকখে থ/𑄗 লারচার অহ্-ব। যেন-
বাংলা মাত: 𑄒𑄨𑄇𑄴 (ঠিক), 𑄒𑄇𑄪𑄢𑄴 (ঠাকুর), 𑄒𑄬𑄣 (ঠেলা) ...।
চাঙমা মাত: 𑄗𑄨𑄇𑄴 (থিক), 𑄗𑄉𑄪𑄢𑄴 (থাগুর), 𑄗𑄬𑄣𑄚 (থেলানা)...।
ড/𑄓 আর দ/𑄘 লারচার: চাঙমা মাত লেকখে ড/𑄓 লারচার ন অহ্-ব। জুদো ভাঝত্তেয় গরচমজিম লারচার অহ্-ব। মাত্তর, চাঙমা মাত লেকখে দ/𑄘 লারচার অহ্-ব। যেন-
বাংলা, ইংরেজি মাত: 𑄓𑄝𑄴 (ডাব), 𑄓𑄧𑄣𑄪 𑄝𑄀𑄥𑄴 (ডলু বাঁশ), 𑄓𑄪𑄟𑄪𑄢𑄴 (ডুমুর), 𑄆𑄓𑄴𑄎𑄬𑄇𑄳𑄑𑄨𑄞𑄴 (এডজেক্টিভ)..𑅁
চাঙমা মাত: 𑄘𑄛𑄴 (দাপ), 𑄘𑄪𑄣𑄪𑄂 𑄝𑄌𑄴 (দুলুঃ বাচ), 𑄘𑄪𑄟𑄪𑄢𑄴 (দুমুর), 𑄥𑄬𑅅𑄘𑄳𑄠𑄬 (সোদ্যে), 𑄃𑄘𑄴𑄙𑄚𑄴 (আদধান)...।
ঢ/𑄔 আর ধ/𑄙 লারচার: চাঙমা মাত লেকখে ঢ/𑄔 লারচার ন অহ্-ব। জুদো ভাঝত্তেয় গরচমজিম লারচার অহ্-ব। মাত্তর, চাঙমা মাত লেকখে ধ/𑄙 লারচার অহ্-ব। যেন-
বাংলা মাত: 𑄔𑄬𑅅𑄣𑄴 (ঢোল), ঢেঁকি (𑄔𑄬𑄀𑄇𑄨), 𑄔𑄬𑄢𑄧𑄥𑄴 (ঢেরস) ..𑅁
চাঙমা মাত: 𑄙𑄪𑄣𑄴 (ধুল), 𑄙𑄨𑄋𑄨 (ধিঙি), 𑄙𑄉𑄥𑄪𑄟𑄨 (ধাগাসুমি)...।
ণ/𑄕 আর ন/𑄚 লারচার: ণ/𑄕 আর ন/𑄚 উচ্চারণ এক্কুয় অহ্-লেও চাঙমা মাত লেকখে ণ/𑄕 লারচার ন অহ্-ব, বেক জাগাত ন/𑄚 লারচার অহ্-ব । জুদো ভাঝত্তেয় গরচমজিম যেকখে যিবে লাগে সিবে লারচার অহ্-ব। যেন-
বাংলা মাত: 𑄛𑄧𑄕𑄴 (পণ), 𑄎𑄧𑄚𑄧𑄉𑄧𑄕𑄴 (জনগণ), 𑄣𑄧𑄝𑄧𑄕𑄴 (লবণ)...।
চাঙমা মাত: 𑄜𑄪𑄚𑄴 (ফুন), 𑄈𑄧𑄚𑄴 (খন), 𑄉𑄳𑄠𑄬𑄚𑄨 (গ্যেনি), 𑄚𑄪𑄚𑄴 (নুন)...।
ই/𑄄, ধেলভাঙা/𑄭 আর ি/𑄨 মাজারা লারচার: বাংলাত ই'বুর আধাগাইমাত্যে মাজারা নেই কিনেই ই'বু দিনেই সে কামান সিরা পরে। যেন- বই (উচ্চারণ- বৈ/বই্; বয়ি নয়), যাই (উচ্চারণ- যাই্; যায়ি নয়)। সেনে বাংলা অহ্-রগে চাঙমা মাত লেকখেও গরচমজিম আধাগাইমাত্যে-ই রত্তেয় 'ই' লেঘা পরিবু। মাত্তর, সিগুন চাঙমা অহ্-রগে লেকখে খামাক্কায় ধেলভাঙা/𑄭 মাজারা দিনেই লেঘা পরিবু। যেন-
𑄃𑄬𑄬𑄭𑄌𑄴 (এইচ), মাত্তর 𑄃𑄬𑄬𑄄𑄌𑄴 নয়। 𑄃𑄭 (আই), মাত্তর 𑄃𑄄 নয়। 𑄣𑄪𑄭 (লুই), মাত্তর 𑄣𑄪𑄄 নয়।
আর গত্তাল 'ই' রবুত্তেয় 𑄄 আর ি/ 𑄨 মাজারা লারচার অহ্-ব। যেন-
𑄄𑄎𑄬𑅅𑄢𑄴 (ইজোর), 𑄄𑄙𑄪 (ইধু), 𑄢𑄚𑄨 (রানি), 𑄝𑄨𑄚𑄨 (বিনি)𑅁
অই, ঐ/𑄃𑄰, ৈ/𑄰 লারচার: 'ঐ/𑄃𑄰' রত্তেয় খামাক্কায় গরিহ্ 𑄰 মাজারা লারচার অহ্-ব, অই/ওই(𑄃𑄧𑄄/𑄃𑄬𑅅𑄄) লারচার ন অহ্-ব। যেন- 𑄝𑄬𑄢𑄬𑄠𑄰(বেরেয়ৈ), মাত্তর বেরেয়ই/বেরেয়োই নয়; 𑄛𑄰 (পৈ), মাত্তর পই/পোই নয়), মারিচ্চৈ (𑄟𑄢𑄨𑄌𑄴𑄰), মাত্তর মারিচ্চই/মারিচ্চোই নয়)
𑄭 আর য়্/𑄠𑄴 লারচার: চাঙমা মাদত 𑄠𑄴 কম লারচার অহ্-ব, বেচভাক 𑄭 লারচার অহ্-ব। মাত্তর, 'মিলন্দিবলা', 'বিভক্তিবলা' আর 'কামবুচদারি' মাত্থুন লেকখে য়্/𑄠𑄴 লারচার অহ্-ব। যেন-
তর+লায় = তল্লায় (𑄖𑄧𑄣𑄳𑄣𑄠𑄴), কি+অত্থেয় = কিত্থেয় (𑄇𑄨𑄖𑄳𑄗𑄬𑄠𑄴), কিয়ং+অত্তেয়= কিয়ঙত্তেয় (𑄇𑄨𑄠𑄧𑄋𑄧𑄖𑄴𑄬𑄠𑄴)...। এ বাদেও তান্যে রত্তেয় 𑄭 মাজারাান লারচার অহ্-ব। যে'ন- এইম (𑄃𑄬𑄬𑄭𑄟𑄴), খেইম (𑄈𑄬𑄬𑄭𑄟𑄴), 𑄡𑄬𑄬𑄭𑄌𑄴 (যেইচ), 𑄇𑄬𑄬𑄭 𑄖𑄴 (কেইত)
ধকজুদো: 𑄇𑄧𑄠𑄴 (কয়), 𑄚𑄧𑄦𑄴𑄠𑄴 (নহ্'য়), 𑄗𑄧𑄠𑄴 (থয়)
জুদো ধগে: 𑄥𑄨𑄊𑄨𑄭 (সিঘিই), 𑄣𑄨𑄊𑄨𑄭 (লিঘিই), 𑄞𑄪𑄭 (ভুই)...।
𑅆 (আাই্) লারচার: ধেকলাম্বা গরিহ্ 'আাই্' রত্তেয় 𑅆 মাজারাান লারচার অহ্-ব, বাংলাত সেধক্যে মাজারা ন থানাই আাই, এএই, অঅই এঙিরিহ্ লেঘা পরিবু। এক কধায় বেক গাইমাত্যে রউন্বরে ধেকলাম্বা গরিহ্ দিবু 𑅆 মাজারাানে। যেন-
𑄚𑄧𑅆 (নঅই), 𑄉𑅆 (গাাই), 𑄃𑄬𑅅𑄟𑄬𑅆 (ওমেএই), 𑄇𑄬𑅆 ্(কেএই), 𑄛𑄨𑄚𑄨𑅆 (পিনিইই), 𑄇𑄧𑅆 (কঅই), 𑄃𑄚𑄨𑅆 (আনিইই), 𑄚𑄬𑅆৷ (নেএই), 𑄢𑄬𑅅𑅆 (রোওই), 𑄝𑄬𑅅𑅆 (বোওই), 𑄢𑄪𑅆 (রুউই), 𑄉𑄬𑅆𑄠𑄨 (গেএইয়ি)...।
𑅅 মাজারা লারচার: ধেকলাম্বা গরিহ্ 'আা' রত্তেয় 𑅅 মাজারাান লারচার অহ্-ব। যে'ন-
𑄃𑅅 (আা), 𑄉𑅅 (গাা), 𑄌𑅅𑄁 (চাাং), লামাা (𑄣𑄟𑅅), 𑄃𑄚𑅅 (আনাা), 𑄇𑄟𑅅 (কামাা), 𑄝𑅅 (বাা), 𑄌𑄋𑄴𑄟𑅅 (চাঙমাা)...।
ধকজুদো: 𑄝𑄢𑄴𑄟 (বার্মা), 𑄣𑄢𑄴𑄟 (লারমা)...।
𑄆/𑄬 (অ্যা) আর 𑄃𑄬𑄬 (এ) লারচার: চাঙমাাত অ্যা/𑄆 আর এ/𑄃𑄬𑄬 জুদো র। এ দ্বিবে অদল-বদল গরিলে মাদর অত্থ বদলি যাই। সেনে অ্যা/𑄆 জাগাত এ/𑄃𑄬 লারচার গরাহ্ ন যেব। যেকখে যে র মাদে সেকখে সে র-বলা অহ্-রক, মাজারা দিনেই লেঘা পরিবু। যে'ন-
𑄆𑄇𑄴 (অ্যাক), 𑄙𑄬𑄇𑄴 (ধ্যাক), 𑄥𑄬𑄇𑄴 (স্যাক), 𑄛𑄬𑄇𑄴 (প্যাক), 𑄥𑄬𑄢𑄬 𑄥𑄬𑄢𑄬 (স্যারে স্যারে)
𑄃𑄬𑄬𑄉𑄬𑄬𑄟𑄴 (এগেম), 𑄛𑄬𑄬𑄇𑄴 (পেক), 𑄜𑄬𑄬𑄌𑄴 (ফেচ), 𑄇𑄨𑄎𑄬𑄬𑄇𑄴 (কিজেক), 𑄥𑄬𑄬𑄢𑄬𑄬 𑄥𑄬𑄬𑄢𑄬𑄬 (সেরে সেরে)
𑄥/স/শ/ষ আর 𑄍/ছ লারচার: বাংলার স, শ,ষ আজায় চাঙমাাদি 𑄥 লিঘিবং। 𑄥'বু বানা চাঙমাা মাদর পৈল্যে বঝিবু। যে'ন- 𑄥𑄉𑄧𑄢𑄴 (সাগর), 𑄥𑄪𑄉𑄪𑄚𑄨 (সুগুনি), 𑄥𑄨𑄘𑄬𑅅𑄣𑄴 (সিদোল), 𑄥𑄉𑄬𑅅𑄚𑄴 (সাগোন), 𑄥𑄝𑄢𑄁 (সাবারাং), 𑄥𑄧𑄚𑄴 (সন), 𑄥𑄚𑄴𑄖𑄨 (শান্তি), 𑄥𑄨𑄢𑄬𑅅𑄚𑄟𑄴 (শিরোনাম)...।
চাঙমার 𑄍 জাগাত বাংলাদি 'ছ' লিঘিবং। 𑄍'বু চাঙমা মাদর পৈল্যে আ মধ্যে বঝিবু। যে'ন- 𑄍𑄧𑄢 (ছরা), 𑄆𑄌𑄴𑄍𑄪𑄌𑄴 (এচ্ছুচ), 𑄇𑄬𑄌𑄴𑄍𑄧 (কেচ্ছ), 𑄢𑄨𑄌𑄴𑄍𑄬𑅅 (রিচ্ছো), 𑄝𑄌𑄴𑄍𑄪𑄢𑄨 (বাচ্ছুরি)...।
বাংলার র্ আর রেফ জাগুলুক: বাংলাত যিয়োত র্ আর রেফ সিয়োত চাঙমাাদি 𑄢𑄴 অহ্-ব। যে'ন- 𑄃𑄢𑄴𑄡𑄧 (আর্য), 𑄟𑄫𑄢𑄴𑄈𑄧 (মূর্খ), 𑄥𑄧𑄢𑄴𑄇𑄢𑄨 (সরকারি), 𑄥𑄧𑄢𑄴𑄖𑄧 (শর্ত), 𑄖𑄧𑄢𑄴𑄇𑄢𑄨 (তরকারি)... 𑅁
ঃখ আর ক্ষ জাগুলুক: বাংলাত মাদর মধ্যে 'ক্ষ' আর 'ঃখ' লেঘা থেলে চাঙমাাদি সিয়োত 𑄇𑄳𑄈/ক্খ লারচার অহ্-ব। যে'ন- 𑄘𑄪𑄇𑄳𑄈𑄧 (দুঃখ), 𑄥𑄨𑄇𑄳𑄈 (শিক্ষা), 𑄞𑄨𑄇𑄳𑄈𑄪 (ভিক্ষু), 𑄢𑄪𑄇𑄳𑄈𑄧 (রুক্ষ), 𑄃𑄧𑄇𑄳𑄈𑄧𑄢𑄴 (অক্ষর), 𑄢𑄇𑄳𑄈𑄧𑄥𑄴 (রাক্ষস)...। মাদর পৈলেদি 'ক্ষ' থেলে তার উচ্চারণর ধগে চাঙমাাদি 𑄈/খ লেঘা পরিবু। যে'ন- ক্ষতি (𑄈𑄧𑄖𑄨), ক্ষমা (𑄈𑄧𑄟), ক্ষীণ (𑄈𑄩𑄕𑄧)...𑅁
ঋ আর ঋ-কার (ৃ) জাগুলুক: বাংলাত যিয়োত 'ঋ' সিয়োত '𑄢𑄨' আা ঋ-কার (ৃ) সিয়োত চাঙমাাদি 𑄳𑄢𑄨 (্রি) লেঘা পরিবু। যে'ন- মাতৃ (𑄟𑄖𑄳𑄢𑄨), আকৃতি (𑄃𑄇𑄳𑄢𑄨𑄖𑄨), দৃঢ় (𑄘𑄳𑄢𑄨𑄢𑄧)...𑅁
ধকজুদো: হৃদয় (𑄢𑄳𑄦𑄨𑄘𑄧𑄠𑄴)।
হ্র জাগুলুক: বাংলার 'হ্র' উচ্চারণ 𑄢𑄳𑄦𑄧𑅁 সেনে বাংলাত যিয়োত 'হ্র' চাঙমাাদি সিয়োত '𑄢𑄳𑄦' অহ্-ব। যে'ন- হ্রদ (𑄢𑄳𑄦𑄧𑄘𑄴), হ্রেষা (𑄢𑄳𑄦𑄬𑄬𑄥), হ্রাস (𑄢𑄳𑄦𑄥𑄴)। সে বাবদর র-বলা চাঙমা মাত লেঘদে বাংলা বানানর ধগে লেঘা পরিবু। যে'ন- 𑄢𑄳𑄦𑄪𑄇𑄳𑄠𑄬𑄁 (হ্রুক্যেং), 𑄃𑄢𑄳𑄦𑄨 (আহ্রি), 𑄘𑄢𑄳𑄦𑄨 (দাহ্রি), 𑄢𑄳𑄦𑄧𑄁𑄢𑄁 (হ্রংরাং), 𑄟𑄢𑄳𑄦𑄬𑄬𑄌𑄴 𑄥𑄇𑄴 (মাহ্রেচ সাক)...।
ব-ফলা জাগুলুক: বাংলার ব-ফলার উচ্চারণ অসমীয়ার 'ৱ' সান 'ওয়' গরিহ্ মাদে। সেনে বাংলা মাদর ব-ফলা জাগাত 𑄳𑄤 (𑄤-মাজারা) লারচার অহ্-ব। যে'ন- বিশ্ব (𑄝𑄨𑄥𑄴𑄳𑄤𑄧), স্বাদ (𑄥𑄳𑄤𑄘𑄴), ধ্বনি (𑄙𑄳𑄤𑄧𑄚𑄨), ধ্বংস (𑄙𑄳𑄤𑄧𑄁𑄥𑄧), ত্বক (𑄖𑄳𑄤𑄧𑄇𑄴), স্বামী (𑄥𑄳𑄤𑄟𑄩), আশ্বাস (𑄃𑄥𑄴𑄳𑄤𑄥𑄴)...।
হ্ম আর ম্হ জাগুলুক: 'হ্ম' বুরে ভাঙিলে অহ্-য় হ্+ম। সেনে চাঙমাাদি লেকখে লেঘা পরিবু 𑄦𑄳𑄟 𑅁 যে'ন- ব্রাহ্মণ (𑄝𑄳𑄢𑄦𑄳𑄟𑄧𑄕𑄴), ব্রাহ্মী (𑄝𑄳𑄢𑄦𑄳𑄟𑄩)...। চাঙমাত 'ম্হ' রবু আঘে। যেন- 𑄃𑄟𑄳𑄦𑄧𑄇𑄴 (আম্হক), 𑄇𑄟𑄳𑄦 (কাম্হা)...𑅁
𑄄(ই) আর 𑄃𑄩 (ঈ) লারচার: বাংলাত ই আর ঈ এক্কুয় উচ্চারণ অহ্-লেও চাঙমাত এক্কুই নয়। চাঙমার 𑄄/𑄃𑄨 ধেকবাধি আর 𑄃𑄩 ধেকলাম্বা র। সেনে তারাার (ই=ি) আর ঈ=ী) মাজারাানিও সে ধগে লারচার অহ্-ব চাঙমা ভাঝত্তে। যে'ন- 𑄛𑄚𑄩 (পানী), 𑄃𑄚𑄩𑄌𑄴 (আনীচ), 𑄢𑄚𑄩𑄌 (রানীচ), 𑄝𑄚𑄩𑄌𑄴 (বানীচ), 𑄇𑄢𑄩 (কারী)...। মাত্তর বাংলা মাত লেকখে, বাংলা বানানর ধগে লেঘা পরিবু। যে'ন- পানি (𑄛𑄚𑄨) [খালিক, পানীয় = 𑄛𑄚𑄩𑄠𑄧], 𑄢𑄨𑄚𑄩 (ঋণী)...।
জ্ঞ জাগুলুক: জ+ঞ মিলিনে জ্ঞ। ইভে মাদর পৈলেদি বঝিলে 'গ্যা' আর মধ্যেদি বঝিলে 'গ্গ' সান গরিহ্ মাদে। সেনে চাঙমাাদি লেকখে তার উচ্চারণমজিম লেঘা পরিবু। যে'ন- জ্ঞান (𑄉𑄳𑄠𑄚𑄴), বিজ্ঞান (𑄝𑄨𑄉𑄳𑄠𑄚𑄴), অজ্ঞ (𑄃𑄧𑄉𑄳𑄉𑄧)...।
মাজ্যে (𑄴) লারচার
সুবুল চাঙমাা মাত লেকখে মাজ্যেপাদর সুধোমমজিম ১২বু অহ্-রগত মাজ্যে লারচার অহ্-ব। সুবুল চাঙমাা মাত সিগুনরে বুঝেব যিগুন চাঙমাা ঘাচ্চারায় মাদন। ১১বু অহ্-রক অহ্-লাক্কে- 𑄇, 𑄋, 𑄌, 𑄐, 𑄖, 𑄚, 𑄛, 𑄟, 𑄢, 𑄣, 𑄠, 𑄦𑅁
ধক (𑄙𑄧𑄇𑄴), চাঙমা (𑄌𑄋𑄴𑄟), গাচ (𑄉𑄌𑄴), পুঞ্ঞ্য (𑄛𑄪𑄐𑄴𑄳𑄠𑄧 ), গাত (𑄉𑄖𑄴), সাগোন (𑄥𑄉𑄬𑅅𑄚𑄴), ভাপ (𑄞𑄛𑄴), আলাম (𑄃𑄣𑄟𑄴), সাগর (𑄥𑄉𑄧𑄢𑄴), আল (𑄃𑄣𑄴), সেনত্তেয় (𑄥𑄬𑄚𑄧𑄖𑄴𑄬𑄠𑄴), 𑄣𑄬𑅅𑄦𑄴 (লোহ্), পাহ্ (𑄛𑄦𑄴)।
ধকজুদো: মত নয় মদ (𑄟𑄧𑄘𑄴), তাচজুর নয় তাজ্জুর (𑄖𑄎𑄴𑄪𑄢𑄴), মতদে নয় মদ্দে (𑄟𑄧𑄘𑄴𑄬), গতদনা নয় গদ্দনা (𑄉𑄧𑄘𑄴𑄧𑄚), সুতদো নয় সুদ্দো (𑄥𑄪𑄘𑄴𑄬𑅅৷), বুতধো নয় 𑄝𑄪𑄘𑄴𑄙𑄬𑅅 (বুদ্ধো), এতদূর নয় এদ্দূর (𑄆𑄘𑄴𑄘𑄫𑄢𑄴), ...।