তিনকুরি বঝরর ফাগুনত (চাকমা কবিতা)

- বিকেন চেগে

তর তিনকুরি বঝরর ফাগুনত এলে ফিরি;
উদোল ফুলুন গুজেই দিম ত’চুলান ধোরি,
ভেকফুলুন আনি ঝারভুন,গোজেম্ভি তরে
আঝি যেদুং চাঙ সন্ধেও ত’কোচপানার ভরে!

তর তিনকুরি বঝরর ফাগুনত এলে ফিরি;
বেরেদুঙ চাঙ মেয়োনি, চেঙেত ত’আহ্‌ধ ধোরি,
পাউন্দি খেদত মন রাঙে রাঙে সাজে তুলিবের
ত’ করতপরি বাঝি বেই বেই
সুখ্যে ধোজ্জেত দুবিবের ।

তর তিনকুরি বঝরর ফাগুনত এলে ফিরি;
সেমেই ফুল পেদেবঙ দ্বিজনে,সমারে-সুমুরি,
ধুলনত ধুলিবং জাম বিজি গাঝত দরি বানী
দ্বিজনে আহ্‌ঝিবঙ মন গুমোরর কোচপানা আনি!

তর তিনকুরি বঝরর ফাগুনত এলে ফিরি;
বেরা যেবঙ আর’ দ্বিজনে মুরোল্যের ছরা, জুরি,
রিনি চেবঙ চিগোন ছরার মাঝ, কাঙারার খারা
বর মাগিবঙ দ্বিজনে মিলি, সুঘি ওদোেক তারা!

তর তিনকুরি বঝরর ফাগুন এলে ফিরি;
ধুধুক, সিঙে বাজেবঙ মনর কাজর ইরি,
জুমরান্যেত বেরা যেবঙ পেঘ’ সমারে মাদিবঙ
ফাগুন’ পুন্নিমাত ইজোরত বঝি গপ মাদিবঙ
তর তিনকুরি বঝরর ফাগুন এলে ফিরি।