মুল কবিতা: পাবলো নেরুদা
চাকমানুবাদ: হাইন্যারাম
মুই চাঙ তুই এগকান
কধা জানি ল'।
তুই খবর পাচ ইয়ান কিদিইক্যা:
যুনি মুই চাঙ রিনি
পহন চানান্হ সিন্দ্হি, ফাওন মাইচ্যা
গাঝ পাদানি মোনঘহ্র ইজোরত্তুন।
যুনি মুই চাঙ ধরি
আগুনও পুজোর বুঝি ন'পাইচ্যা ছেইয়ানিরে
আ ন'লে পুরি যেইয়্যা গাচকত্তাবো কিয়্যাগানরে
বেগকানি, মরে ত সিদ্হু নেযাই যিয়ানি।
মনে গরঙ বেগকানিই আঘে
তুমবাচ, জুনপহর, বলিত দিয়্যা কানবাঝা।
এল্হ চিগোন ন'গানি, যেদ্হ যিয়ানি
উই দুরোত ত মন্হ চরউনোত, যে চরউন বাইচ্যা থেদাক বানা মত্যেই।
আহ কি গরানা, ইগকুনু
যুনি এগকা এগকা গরি কোচ ন'পাচ আর মরে
মত্তুনও এগকা এগকা গরি, ছারি দে পরিবু কোচপানা তরে।
যুনি আবাদ্হা গরি
পুরি ফেলাচ মরে তুই
ন'তগাচ আর মরে
বুঝি লোচ, ইদোত ন'তুলোঙ আর মুইও তরে।
যুনি তুই মনে গরচ, ম জিংকানিত বেই যেইয়্যা
মাধাহারাপ্যা-নেইয়্যা বয়্যারানি লাম্বা
আ গরচ ছার
মরে ফেলেই যেবার
ম মন্হ জুমোলেজাত, যিয়োত আঘে শিঙোর মর।
মনত রাগেচ
এ সিদিইন্যা,
এ সে অক্তবোত্তুন লাগোদি
আত্তানি ছারেই লোম মুই মর,
ম কোচপানাগানও তগেব নুও জুম আরও।
খালিক
যুনি দিম্মাগেনেই,
খাগকে খাগকে
তুই ভাবচ তর জনম বানা মত্যেই
চোঘে মুনি ন'পাইচ্যা কিরব্যালোই,
যুনি দিম্মাগেনেই ইক্কু সত্তরং ফুল
ফুদেগি ত বুগোত বানা মত্যেই,
ও পরাণবেবেই, ও ধনপুদি মর,
ফিরি এব আঘ কোচপানা মনত মর
মনে গরিচ, মুই কিচ্চু ন'এজঙ ফেলেই
মুই কিচ্চু ন'ফেলাঙ পুরি
ম কোচপানা বাজি থেব ত কোচপানাত, কোচপানাবি।
যেধকদিন কোচ তুই পেবে মরে
ম কোচপানা থেব ত বুগোত
মরে ফেলেই ন'গেলে।